心经

长版本

jalafungga sure -i cargi dalin de akūnaha niyaman sere nomun

han -i araha jalafungga sure -i cargi dalin akūnaha niyaman sere ging ni siui

niyaman sere ging ni siui

daci wargi ba -i Tang gurun -i hūwašan yuwan juwang ubaliyambufi, ulame selgiyefi te de isibuhabi tuwaci, nenehe Tang gurun -i bithei dorgi yuwan juwang ni juwan bithede, jeng guwan -i sucungga forgon de, wargi bade genefi, juwan nadaci aniya amasi jihe manggi, tai dzung hese wasimbufi, ninggun tanggū susai nadan yohi enetkek hergen -i ging be, h'ūng fu sy' de ubaliyambuha niyaman sere ging, terei dorgi emu bacin, tuttu ofi sung gurun -i suduri -i i wen j'y bithede, yuwan juwang ni ubaliyambuha sure -i cargi dalan de akūnaha niyaman sere ging emu debtelin bihebi, Tang gurun -i be Gioi I -i araha Su Jeo -i Cung Yuwan Sy' -i Fa Hūwa Yuwan -i wehei fajiran -i ging ni bithei gisun doro -i buraki be untuhun obufi.

fucihi -i mergen be songkolorongga sure -i cargi dalin de akūnaha niyaman sere ging ci dulenderengge akū sehebi. uheri juwe tanggū susai jakūn hergen, uthai te -i ulame selgiyehe ging bithe inu. šengdzu gosin hūwangdi -i baha wargi dzang ni niyaman sere ging ni da bithe, uheri sunja tanggū susai sunja hergen. te -i ging bithede, duibuleci, julergi amala fisembume tucibume banjibume arahangge umesi yongkiyame akūmbuhabi. erei dorgide gisun acabuhangge inu narhūšaha dulemšehe encu adali babi. ere uthai niyaman sere ging ni yongkiyaha bithe. seibeni ulame selgiyehengge eden dadun yongkiyame akū be saha. šengdzu abkai salgabuha enduringge niyalma ofi, ferguwecuke wesihun ambula taifin de isibufi, dasan tacihiyan dasabufi, getuken oho eiten kooli be wacihiyame ilibuha. amba ajige hešen hergin, eden ekiyehun ningge akū tuttu bime, enduringge tacin umesi šumin ojoro jakade, giyan be mohobume banin be akūmbume abka niyalma šuwe hafufi, i g'ing, ši g'ing, šu g'ing, ts'ūn ts'io -i narhūn gisun, amba jurgan be iletuleme getulehengge, abkai dulimbai šun -i adali ohobi. yaya lioi -i mudan, hūwangli -i fa, bodoro hacin, geren dzy' suduri, tanggū booi bithe be, aname tuwame bireme kimcime narhūn somishūn be akūmbume sibkihakūngge akū, uthai fucihi loo dzy' -i bithe seme, inu gūnin mujilen de tebuhe bithe, te bicibe, ere niyaman sere ging bithe be, minggan aniya funcetele eden dadun ulame selgiyefi, umai kimcihakū babe urunakū yongkiyame akūmbuhangge be baifi, teni nakahabi enduringge tacin -i ambula enduringge dasan -i narhūn getuken be, ede gemu saci ombi bi. dobori inenggi akū gūnin sithūfi, nenehe gung be amcame, gūnime, yaya šengdzu -i werihe emu gisun. emu hese seme sirame fisembure be sitabure ayoo sembi. ere ging bithe be šengdzu bithei ambasa de afabufi kimcime acabuha gojime. foloro unde bithe, te cohome undehen de folobufi bireme selgiyefi, abkai fejergi, amagan jalan de, amba enduringge niyalmai mujilen be baitalarangge, udu ser sere ba ci aname, inu gemu yongkiyabufi eden akū obuha gūnin uttu be ulhibuhe.

hūwaliyasun tob -i sucungga aniya jorgon biyai ice jakūn.

jai siui

han -i dasame foloho niyaman yongkiyaha debtelin -i šutucin.

seibeni mini han mafa gosin hūwangdi wargi dz'ang ci baha fe bihe niyaman -i nomun uheri sunja tanggū susai sunja hergen. jalan de ulaha tang gurun -i hūwašan yuwan juwang ni ubaliyambuhangge ci hergen gisun labdu komso majige adali akū bime julergi amargi muru be tuwaci, yala ere yongkiyame akūnahabi. tuttu hesei bithei ambasa de afabufi acabume tuwafi dolo asarabuha, han ama soorin de tehe tuktan de, uthai šutucin arafi folofi badarambume ulahabi. uttu nenehe sain be algimbume fisembume. fucihi nomun be nambula eldembuhengge gūnin umesi jiramin. bi baita icihiyara šolo de, gingguleme hūlame, dabtame kimcime, narhūšame gūnime, šumilame sibkire jakade dolo majige ulhihebi. tuttu manju nikan enetkek tanggūt -i geren bithe be gaifi, ishunde duileme kimcime acabufi dasame folobuha, hergen gisun be inu majige tuwancihiyame dasaha babi wargi ci, jihe amba jorin bithe hergen ilibuhakū bime, bi emu gisun emu hergen de uttu gūnin tebuhengge, cohome wargi ci jihe da jorin ede bi. getuken de isibuhakū oci ojorakū sere turgun, uttu seme inu gisun hergen de memereme, fi hoošan de baitalahangge waka, ere nomun be hūlara urse ini cisui ulhici acambi. folome šanggabufi, han ama -i beye arahangge de gingguleme sarabuha.

Jalafungga Sure -i Cargi Dalin de Akūnaha Niyaman Sere Nomun

Enetkek -i gisun de, bhāgaūati (bā-ga-wa-di) prajñā (pra-dz'niya) pāramitāhrdaya (pa-a-ra-mi-ta-a-hr-da-ya)

Manju gisun de, eteme yongkiyafi colgoroko eme sure -i cargi dalin de akūnaha niyaman nomun

uttu seme mini donjihangge emu fonde, eteme yongkiyafi colgoroko fucihi Raadz'agirha hecen -i G'adarikut alin de bodisado geren gelung hūbarak uhei isafi tembihe, tere fonde, eteme yongkiyafi colgoroko fucihi šumin narhūn be genggiyelembi sere samadi (samadhi) cib seme dosimbihebi. ineku tere nergin de bodisado mahasado arya awalogida šori(šūari) barandz'a baramida -i šumin narhūn doro be sibkime ulhifi, sunja iktan -i da banin be inu untuhun seme bahabuha tereci fucihi -i adisti -i hūsun de jalafungga šaribudari bodisado mahasado arya awalogida šori de fonjihangge, a! sain fulehengge jui! barandz'a baramida -i šumin narhūn doro be yabuki seme buyere urse adarame tacime yabuci acambi fonjiha manggi, bodisado mahasado arya awalogida šori jalafungga šaribudari de jabume, a šaribudari! sain fulehengge juse, sain fulehengge sargan juse, barandz'a baramida -i šumin yabun be yabuki seme buyerele urse uttu obume tuwa, tenteke sunja iktan -i da banin inu untuhun seme yargiyalaci acambi, dursun uthai untuhun, untuhun uthai dursun inu, dursun untuhun ci encu akū, untuhun dursun encu akū, tere ci serere gūnire weilere ulhirengge gemu untuhun kai. a šaribudari, tuttu ofi eiten jaka gemu untuhun, temgetu banin akū, banjin akū, gukubun akū, icihi akū, icihi ci aljarangge inu akū, ekiyen akū, nonggin akū kai. a šaribudari, tuttu ojoro jakade, untuhun de dursun akū, serebun akū, gūnijan akū, weilen akū, ulhibun akū, yasa akū, šan akū, oforo akū, ilenggu akū, beye akū, gūnin akū, dursun akū, jilgan akū, wa akū, amtan akū, aligan akū, jaka akū kai. yasa -i fulehe akū sere ci gūnin -i fulehe de isitala inu akū, gūnin -i ulhirengge -i fulehe de isitala inu akū kai. mentuhun akū, mentuhun wajin akū sere ci sakdara bucere akū, sakdara bucere wajin akū, sere de isitala inu gemu akū kai. tuttu ofi jobolon, eiten -i banjin gukubun, songko gemu akū sure ulhisu akū, bahabun akū baharakūngge inu akū kai. a šaribudari, tuttu ofi bodisado sa bahabun akū turgunde, barandza baramida de akdara nikefi, gūnin de dalibun akū ojoro jakade, gelere ba inu akū calgabun fudasi ci fuhali ukcafi, amba nirwan -i ten de isinaha. ilan forgon de enggelenjihe geren fucihi barandz'a baramida akdafi, duibuleci ojorakū unenggi hafuka bodi doro be iletu yongkiyafi fucihi oho. tuttu ofi barandz'a baramida -i tarni, amba ulhisungge tarni, duibuleci ojorakū tarni, jergileci ojorakū de jerilere tarni, eiten jobolon be yooni mayambure tarni, holo waka unenggi seme safi, barandz'a baramida -i tarni be tarnilaha, da-dya-ta g'ada g'a-da ba-ra-ga-da, ba-ra-sang-ga-da ba-dhi sowa-ha.

a šaribudari bodisado mahasado sa tere gese šumin narhūn barandz'a baramida de tacikini sehe, tede eteme yongkiyafi colgoroko fucihi samadi ci aljafi, bodisado mahasado arya awalogida šori de sain seme g(h?)endufi, geli sain sain. fulehengge juse tere tuttu inu. tere yargiyan -i tuttu ombi, sini giyangnaha yaya šumin narhūn barandz'a baramida be urebume tacime yabuci, ineku jihe fucihi ele yooni dahame urgunjendumbi. eteme yongkiyafi colgoroko fucihi tuttu hese wasimbuha manggi, jalafungga šaribudari bodisado mahasado arya awalogida šori geren gucuse jai abkai enduri niyalma, asuri,g'andari jalan de bisirenggele gemu gingguleme dahafi eteme yongkiyafi colgoroko fucihi -i hese be iletu maktame saišaha.

enduringge sure -i cargi dalin de akūnaha niyaman sere nomun yongkiyaha.

eten yongkiyafi duleke eme sure -i cargi dalin de akūnaha niyaman sere ging jokiyaha, eiten fa gemu turgun ci banjihangge, tere turgun žulai fucihi gisurehe, turgun be mukiyerengge we seci, amba šarmani tuttu seme genduhebi, yaya ehe be ume deribume. eiten sain be akūmbume yabu, mujilen be umesi tuwancihiyaci tere uthai fucihi -i tacihiyan inu hūfuri fengšen sain.

短版本

barandz'a baramita -i šumin yabun be yabuki seme buyerele urse uttu obume tuwa, tentehe sunja iktan -i da banin inu untuhun seme yargiyalaci acambi, dursun uthai untuhun, untuhun uthai dursun inu. dursun untuhun ci encu akū, untuhun dursun ci encu akū.

a šaribudari, tuttu ofi eiten jaka gemu untuhun temgetu banin akū, banjin akū gukubun akū, icihi akū, icihi ci aljarangge inu akū, ekiyen akū, nonggin akū kai.

a šaribudari, tuttu ojoro jakade untuhun de dursun akū, serebun akū, gūnijan akū, weilen akū, ulhibun akū, yasa akū, šan akū, oforo akū, ilenggu akū, beye akū, gūnin akū, dursun akū, jilgan akū, we akū, amtan akū, aligan akū, jaka akū kai. yasa -i fulehe akū sere ci, gūnin -i fulehe de isitala inu akū, gūnin -i ulhirengge -i fulehe de isitala inu akū kai.

mentuhun akū, mentuhun wajin akū sere ci, sakdara bucere akū, sakdara bucere wajin akū sere de isitala inu gemu akū kai. tuttu ofi jobolon eiten -i banjin, gukubun, songko gemu akū. sure ulhisu akū, bahabun akū, baharakūngge inu akū kai.

a saribudari, tuttu ofi bodisado sa bahabun akū turgunde barandz'a baramida de akdalame nikefi, gūnin de dalibun akū ojoro jakade, gelere ba inu akū, calgabun fudasi ci fuhali ukcafi, amba nirwan -i ten de isinaha, ilan forgon de enggelejihe geren fucihi barandz'a baramita de akdafi, duibuleci ojorakū unenggi hafuka bodi doro be iletu yongkiyafi, fucihi oho.

tuttu ofi barandz'a baramida -i tarni, amba ulhisungge tarni, duibuleci ojorakū tarni, jergileci ojorakū de jergilere tarni. eiten jobolon be yooni mayambure tarni. holo waka unenggi seme safi, barandz'a baramida tarni be tarnilaha, datyata: g'adi g'adi barang g'adi barasang g'adi bodi suwaha.