少年中国说
asihata -i dulimbai gurun be gisurehengge
farhūn mergen -i weilere falga -i ubaliyambuhangge,
Liyang Cii Coo(梁启超) araha,
Sulfa(苏尔发) ubaliyambuha,
šutucin
nenehe inenggi bi daruhai cimarilame ilifi dulimbai amsu jetere tanggin(中膳食堂) -i ilaci jergide genefi bithe hūlambihebi, tubade udu gucu faliha, tese salaha aika bithe hūlambime, bi beyei gajiha julen bithe be hūlame, bithe hūlame wajiha deri, emu niyalma kemuni membe isabufi “sonjoho asihata -i dulimbai gurun be gisurehengge” sere fiyelen be niyelebumbihe, bi ere fiyelen be tuwafi, umesi buyeme ofi inu sonjome manju gisun -i ubaliyambuha bihe, ere ucuri tacikū tesebe fisendume geodebumbi(传销) seme bašaha, geli geri nimeku de teisulebume giyalan de teme bifi tulesi yaburakū de, dolo acinggiyabufi šolo jalgiyanjame gulhun fiyelen be gaifi ubaliyambuha.
asihata -i dulimbai gurun be gisurehengge
Nihon niyalma musei dulimbai gurun be hūlambihede, emgeri gisureci sakdasa -i dulimbai gurun sembi, dahūme gisureci da an -i sakdasa -i dulimbai gurun sembi, tere gisun serengge, Eoroba jubki(欧洲) wargi -i ba -i niyalmai gisun be alhūdame ubaliyambuhangge aise. ai, musei dulimbai gurun yala sakdasa de ohoo, liyang cii coo hendume: “ai, ai gisun, ai gisun, mini gūnin de emu asihata -i dulimbai gurun bi.” sehe.
gurun be sakda asihan seme ilgaki seci, neneme niyalma be sakda asihan seme ilga, sakdasa daruhai dulekengge be merkimbi, asihata kemuni jiderengge be seolembi, dulekengge be merkihei, tuttu narašara mujilen dekdehe, jiderengge be seolehei, tuttu erehunjere mujilen banjinaha, narašahai, tuttu fe be tuwakiyambi, erehunjehei, tuttu ibere be baimbi, fe be tuwakiyahai, tuttu enteheme fe ombi, ibere be baihai, tuttu inenggidari icemlembi, dulekengge be merkihei, yaya baita gemu beyei dulembuhengge ofi, uttu damu kooli be songkolome yaburebe sambi, jiderengge be seolehei, eiten baita yooni dulembure undengge ofi, uttu kemuni gelhun akū kemun ci tucinembi. sakdasa daruhai jobošome gūnimbi, asihata kemuni sebjelere be buyembi, jobošohoi, tuttu gūnin musembi, sebjelehei, tuttu sukdun yendembi, gūnin musekei, tuttu lebderembi, sukdun yendehei, tuttu ekteršembi, lebderekei, tuttu dulemšembi, ekteršehei, tuttu haksatambi(冒险), dulemšehei, tuttu jalan jecen be gukubumbi, haksatahai, tuttu jalan jecen be banjinabumbi. sakdasa daruhai baita be eimembi, asihata kemuni baita be cihalambi, baita be eimehei, tuttu daruhai eiten baita be gemu yabuci ojoro ba akū seme serembi, baita be cihalahai, tuttu kemuni eiten baita be yooni yabuci ojorakū ba akū seme serembi. sakdasa yamjishūn šun -i adali, asihata erde šun -i gese, sakdasa macuha ihan -i adali, asihata šurgan tasha -i gese, sakdasa hūwašan -i adali, asihata kangsanggi(侠客) -i gese, sakdasa buleku bithe -i adali, asihata jucubun(剧本) -i gese, sakdasa yarsi dambagu -i adali, asihata buranda arki -i gese, sakdasa yosiha(行星) ci hokoho holton wehe(陨石) -i adali, asihata namu de bisire šuru -i tun -i gese, sakdasa Egipet(埃及) gurun -i gobi -i šulutu subarhan(金字塔) -i adali, asihata Sibir(西伯利亚) -i ba -i selju(铁路) -i gese, sakdasa bolori dubei fodoho -i adali, asihata niyengniyeri sucungga -i orho -i gese, sakdasa Bucen Noor(死海) -i simelen furgibuhe adali, asihata golmin ula -i sekiyen tucinjihe gese, ere uthai sakdasa asihata -i emgi banin -i encu ba -i amba muru inu. Žin Gung(任公) hendume: “niyalma de oci daci uttu bihe, gurun de oci inu uttu.” sehe.
liyang cii coo hendume᠄ nasacuka, sakdasa kai, Siyūn Yang(浔阳) ni ba -i ula -i angga de fifan fithere hehe, genggiyen biya jahūdai -i šurdeme bifi, molo -i abdaha sir siyar seme, jibehun sele ci beikuwen, tolgin de bicibe aimaka tolgin de bisirakū gese fonde, Luwe Yang(洛阳) ni ba -i jalan -i niyengniyeri ilha bolori biya -i sain baita be amcame merkimbi, Amba Ten Gurung(太极宫), yenden hūturingga gurung ni dolo, funiyehe šaraka gurung ni hehesi, suihenehe gese fibun(灯) -i jakade, ilata sunjata bakcilame tefi, K’ai Yuwan(开元), Tiyan Boo(天宝) -i forgon -i duleke baita be leuleme, “nioronggo etuku dethengge adu -i mudan” be arambi. Cing Men(青门) duka -i dungga tarire niyalma, hashū ergi dahashūn hehe de bakcilame, uju marifi ajige jui be tangsulame, heo -i šumin boo, nicuhei sabu kūtu kata sere yendere baita be merkimbi. Napoliyon(拿破仑), Elba tun de falabuha, Orabi(奥拉比), Sy’ri Lank’a(斯里兰卡) tun de horibuha de, juwe ilan tuwakiyara niyalma, eici fujurulanjiha afan amba urse -i emgi, nenehe fon -i seleme jafame kaidu yalume, babade leome feksime, derhi hetere gese Eoroba jubki de dailame, darun taktu de senggileme afara de, emgeri kaicaci, tumen gurun gemu ambalinggū gungge faššan de šurgeceme gelembi seme alaha de, tuktan de deretu forime, sirame suksaha bišume, jiduji buleku de tuwaci, ai, dere fohabi weihe mumuri ohobi, šaraka funiyehe emu sefere ci fulu, oibome duruhabi, ere gesengge, gingkacun(抑郁) ci tulgiyen gūniha baita akū, akacun ci tulgiyen abka na akū, goihororoci tulgiyen šun biya akū, cibsireci tulgiyen asuki wei akū, bucere be aliyaraci tulgiyen yabure baita akū. hojo gege kiyangkiyan niyalma hono uttu oho bade, lulu seme arsari urse be ai hendure, an -i ucuri -i niyaman gucu, gemu eifu ede dosika, ilire tere jetere omirengge, gemu niyalma de nikeme akdambi, enenggi duleci, ainambahafi cimari be sambi, ineku aniya duleci, ainambahafi jidere aniya be gūnimbi, abkai fejergi gubci museke eberi baita, sakdara de isirengge akū, ere niyalma be ohode, tugi be jafara encehen, abka be dahūbure bengsen, alin hafirafi mederi doore gūnin arbun bisire be erehunjeci, ombio jorakūn?
ai, musei dulimbai gurun yala sakdasa de ohoo? te seibeni fon be gūnici, Yoo han, Šūn han, ilan jalan -i fonde, absi ten -i dasabumbihe, Cin Ši Hūwang(秦始皇) han, Han U Di(汉武帝) -i fonde, absi kiyangkiyan bihe, Han gurun Tang gurun ci ebsi šucin(文学) seci, absi yendembihe, Elhe Taifin han Abkai Wehiyehe han ci ebsi coohai gungge seci, absi horonggo bihe, suduri arara ursei fisembume tucibuhe, uculen irgebure ursei deyengguleme uculehengge, musei gurun -i asihan fon -i sain inenggi saikan tuwabun, gūnin de icangga urgun baita be ejeme gisurerakūngge akū bihe. te oibome duruhabi, sikse sunja hoton gaibuha, cimari juwan hecen duribuhe, babade cecike singgeri ukaka, dobori dari coko indahūn aksaka, juwan jakūn goloi ba na boigon hethe, gemu niyalmai hefeli de hefeliyehe yali ohobi, duin tanggū saja amata ahūta juse deote, yooni niyalmai dangse de araha aha ohobi, ainahai “sakdaka manggi hūdai niyalma de buhe.” sehengge -i gese ni? ai, agusa duleke baita be ume gisurere, seksehun erin be tuwame jenderakū, janggaliha de, beyei helmen be emhun -i tuwambi, dubesilehe de, erde sehei yamji be bodorakū, gurun oci, bucere be aliyara gurun, ulusu gurun -i irgen oci, inu bucere be aliyara irgen, tumen baita afabukini umainame muterakū, eiten baita de gemu niyalma de jafabufi gamabumbi, geli ai wakašara babi?
Žin Gung hendume: musei dulimbai gurun yala sakdasa de ohoo, ere oci namhu(地球) -i gubci emu amba fonjin inu. tere unenggi sakdasa de oci, dulimbai gurun uthai duleke gurun ombi, uthai namhu de ere gurun bimbihe, te ulhiyen -i gukume geneme, cimari andande hesebun wajire de isinambi, tere aika sakdasa de ohakū oci, dulimbai gurun uthai jidere gurun ombi, uthai namhu de ere gurun tucinjire unde, te ulhiyen -i badarame geneme, cimari andande juleri on kemuni goro ombi, te -i dulimbai gurun be sakdasa de ohoo? asihata de oho seme lashalaki seci, “gurun” sere hergen -i gūnin ici be neneme getukelerakū oci ojorakū, gurun serengge, ai jaka ni? ba na bisire, irgen bisire, ineku ba na de banjire irgen be tesei banjire tese ba na be dasa seme beyei fafun kooli toktobufi tuwakiyabure, saligan bisire, dahashūn bisire, niyalma tome gemu saligan bifi dahashūn ojoro ohode, te -i wacihiyame ilibuha gurun seci ombi. namhu de wacihiyame ilibuha gurun tucinjirengge, ineku tanggū aniya dabala, wacihiyame ilibuhangge, ciksin -i baita, wacihiyame ilibure unde bime ulhiyen -i wacihiyame iliburede dosinarangge, asihata -i baita, tuttu bi emu gisun de lashalame hendume: “Eoroba jubki -i geren gurun, te ciksika gurun inu, musei dulimbai gurun, te asihata -i gurun inu.” sembi.
te bici, julgei dulimbai gurun de, udu gurun -i gebu bicibe, gurun -i durun akū, eici mukūn -i gurun, eici aiman -i gurun, eici fengnehe goloi beise -i gurun, eici salingga han -i gurun, hacin udu encu bicibe, eitereci, gurun -i muru durun de, emu ubu bimbime emu ubu edelembi, uthai huhuri jusei dodo ci jui ome mutume genere adali, terei beyei emeudebaktakū singgeken e eme mutuhaci tulgiyen, beyei gubci udu murušeme banjiha bicibe, kemuni baitalara ba akū, tuttu yoo han, šūn han -i onggolo, dodo -i forgon inu, šang gurun, jeo gurun -i n ergin, huhuri forgon inu, Kungdzi ci tetele, jusei forgon inu, ulhiyen -i mutume badarame, ne teni juse ci asihata ome mutume hamikabi, terei goidame muturengge, cohome jalan jalan -i ebdereku hūlha terei hūwašara be tookabuha turgun, uthai jusei forgon de nimere fulu, sakdaki tuyembuhengge be, ememungge taka bucere isika seme kenehunjembime, šanggara hūwašara unde -i haran be sarkū adali, duleke be gisurerengge waka, jidere be gisurerengge inu.
tere anggala, seibeni musei dulimbai gurun de yala gurun bihe semeo? damu hargašan bihe dabala, musei hūwang di han -i juse omosi, mukūn de isafi tehe ci ebsi, ere namhu de ilihangge udu minggan aniya ohobi, gurun -i gebu be ai seci, akū kai, te bici, Yoo han -i Tang gurun, Šūn han -i Ioi gurun, Hiya gurun, Šang gurun, Jeo gurun, Cin gurun, Han gurun, Wei gurun, Jin gurun, Sung gurun, Ci gurun, Liyang gurun, Cen gurun, Sui gurun, Tang gurun, Sung gurun, Dai yuwan gurun, Daiming gurun, Daicing gurun serengge, gemu hargašan -i gebu dabala, hargašan serengge, emu uksun -i cisui hethe inu, gurun serengge, irgen -i siden -i hethe inu, hargašan seci, sakdasa -i hargašan asihata -i hargašan serengge bi, gurun seci, sakdasa -i gurun asihata -i gurun serengge bi, hargašan gurun ci encu be dahame, sakdasa -i hargašan asihata -i hargašan seme bodome, gurun be sakdasa -i gurun asihata -i gurun seme toktobume ilgaci ojorakū. Jeo Wen Wang(周文王) han, Jeo U wang(周武王) han, Jeo Ceng Wang(周成王) han, Jeo K’ang Wang(周康王) han -i forgon, Jeo gurun -i asihata -i forgon inu, Jeo Io Wang(周幽王) han, Jeo Li Wang(周厉王) han, Jeo Hūwan Wang(周桓王) han, Jeo Nan Wang(周赧王) han -i forgon, terei sakdasa -i forgon inu, Han G'aodzu(汉高祖) han, Han Wen Di(汉文帝) han, Han Jing Di(汉景帝) han, Han U Di(汉武帝) han -i forgon, han gurun -i asihata -i forgon inu, Han Yuwan Di(汉元帝) han, Han Ping Di(汉平帝) han, Han Hūwan Di(汉桓帝) han, Han Ling Di(汉灵帝) han -i forgon, terei sakdasa -i forgon inu, tereci hargašan tome, ere gese wakangge akū, ere gesengge be hargašan sakdaka seci ombime, gurun sakdaka seci ojorakū, emu hargašan sakdafi bucerengge, uthai emu niyalmai sakdafi bucere adali, mini gisurehe dulimbai gurun de ai dalji, tuttu bime, musei dulimbai gurun, onggolo jalan jecen de tucinjire unde, te teni nege negelehe dabala, abka na absi leli, juleri jugūn hon goro, yebken kai, musei asihata -i dulimbai gurun.
Masdzeini(马志尼) serengge, Idaliya(意大利) gurun -i ilan colgoroko niyalmai bonggo inu, gurun -i baita danara weile de tafi gūwa gurun de ukara jakade, emu “asihata -i Idaliya gurun” sere gebungge isanun(协会) ilibuha, ulusu gurun -i mujingga niyalma, feniyeleme borhome iasanufi acabure jakade, fe gurun be dahūme yendebufi, Idaliya gurun be Eoroba jubki -i emu colgoroko gurun obuhabi, Idaliya gurun serengge, Eoroba jubki -i bonggo sakdasa -i gurun inu, Roma(罗马) gurun gukuhe manggi, ba na gemu Pope(教皇) de oho, hargašan yamun yooni Yuweistehaisi(奥地利) gurun de gaibuha, ainci sakdafi dubesilere hamika sehengge inu dere, damu emu Masdzeini sere gebungge niyalma tucifi, hono ulusu gurun be asihata obume mutere bade, musei yala asihata -i forgon de bisire dulimbai gurun be ai hendure, duin tanggū funcere jeo bisire eldengge ba, duin tanggū saja funcere ambalinggū irgen, ainahai emu Masdzeini -i gesengge akūni?
Gung Dz jen(龚自珍) -i isabun(集合) de emu fiyelen -i irgebun, gebu be “agusa be asihata obume mutere sirebun” sembi, bi hūlara de amuran, terei gūnin be sibkime getukeleki sembi, musei irgen beyei gurun be sakdasa -i gurun seme gūnici, yala sakdasa -i gurun ombi, musei irgen beyei gurun be asihata -i gurun seme ulhici, yala asihata -i gurun ombi. wargi namu ba -i dekdeni gisun: “ilan se -i sakda niyalma bi, tanggū se -i jui bi.” sehebi, eci, sakdasa -i gurun, asihata -i gurun serengge, geli toktoho arbun akū, yargiyan -i irgen -i mujilen hūsun be dahame ibešere ebererengge inu. bi Masdzeini -i gurun be asihata -i gurun obuci ojoro be sabuha gojime, geli musei gurun -i hafan hali -i gurun be sakdasa -i gurun obuci ojoro be sabuha jalin gelehei, uttu oci, horonggo saikan, lergiyen kiyangkiyan, yebcungge ildamu, jalan ci lakcaha asihata -i dulimbai gurun be, Eoroba jubki wargi ba, Nihon gurun -i ursei sakdasa -i gurun seme hūlara de isibuhangge be ainu seci, cohome gurun -i toose jafarangge gemu oiboko haran, udu juwan aniya jakūn fiyentehe gingsiha, udu juwan aniya šanyan bukdari araha, udu juwan aniya alban kaha, udu juwan aniya fulun aliha, udu juwan aniya alibure bukdan alibuha, udu juwan aniya je sehe, udu juwan aniya hengkilehe, udu juwan aniya elhe baihangge waka oci, emu hafan seme bahame muterakū, emu tušan seme wesime muterakū, terei tušan dorgide oci aliha hafan, ilhi hafan ci wesihun, tulergide oci dasan be selgiyere hafan, baicame beidere hafan ci wesihun ningge, tanggū niyalmai dolo, sunja ba yongkiyarakūngge, ainci uyunju ninggun niyalma bidere, yasa dogo akūci šan dutu, gala durgecerakū oci bethe doholon, akūci hontoho beye aššaci ojorakū, terei beyei gubci jetere omire yabure oksoro sabure donjire hendure gisurerengge, hono beye icihiyame gamame muterakū, ilan duin niyalma hashū ici wahiyara sujara de teni bahafi banjire bade, tese de gurun -i baita afabuki seci, buju baja mooi ūren ilibufi abkai fejergi be dasa serengge ci ai encu, tere anggala, tentekengge oci, asihan ciksin -i fonde kemuni Asiya(亚洲) jubki, Eoroba jubki aibide bihe be sarkū, Han G'audzu han, Tang Taidzung(唐太宗) han ya hargašan -i han bihe be sarkū, geli terebe modo mufuyen doosi gamji -i ten de isinara unde seme, urunakū adunggiyame darambume, fehi umgan olhoho, senggi jun sibuha, ergen dubesilehe, hutu de gucu arame tenehe be aliyaci, musei juwe tumen ba -i alin bira, duin tumen tumen irgen -i ergen be uhei tesei gala de jafabuha, ai, sakdasa -i gurun, yala sakdasa de oho kai, tentekengge oci, udu juwan aniyai sidende jakūn fiyentehe gingsiha, šanyan bukdari araha, alban kaha, fulun aliha, alibure bukdan alibuha, je sehe, hengkilehe, elhe baiha be iktambume, minggan jergi joboho jobohoi, tumen hacin -i suilaha suilahai, teni ere fulgiyan jingse alha fenggala -i hafan -i etuku, aliha bithei da sere gebu be baha be dahame, tuttu kalcun -i ebsihe, humšun -i teile tuwakiyambi, uthai giohoto aisin emu šoge be tunggiyeme gaiha de, udu ujui dele akjan šurdeme akjaha seme, kemuni tere fadu be juwe galai watai hefeliyeme, gūwa baita be bodorakū, sarkū, donjirakū adali, tese de gurun gukure hamika, dendebume duribure isika seme alaci, tese donjire aibi, akdara aibi, uthai yala gukuki -i yala dendebukini, bi nadanju ome, jakūnju se ome, damu bairengge, emu udu aniyai sidende, namu niyalma jiderakū, hūlha holo dekderakū ohode, bi emu jalan sebjeleme selahabi, arga akū oci, juwe ilan goloi ba na be meilefi gingguleme kunduleme alibufi, mini udu yamun be hūlašara, udu tanggū tumen irgen be aha obume uncafi, mini sakda ergen be jolire de, ai ojorakū sere babi, ai mangga sere babi sembi. ai, te -i sakda niyalma, sakda amban, sakda jiyanggiyūn, sakda wailan serengge, beyebe tuwancihiyara, boo be teksilere, gurun be dasara, abkai fejergi be necihiyere encehen be, yooni ubade wacihiyame arahabi, wargi edun de emu dobori ofi niyalma sakdakabi, fulgiyan cira wasime funiyehe šarakabi, ilmun -i elcin be oktosi obumbime, ergen hafirara karmani de banjiha inenggi arambi, ai, akacuka, erebe gurun obure ohode, sakdafi bucerahū sere anggala, bi hono terebe sede isinara unde de enderahū sembini?
Žin Gung hendume: te -i sakdasa -i dulimbai gurun oburengge, dulimbai gurun -i oiboko haran, amaga inenggi asihata -i dulimbai gurun oburengge, dulimbai gurun -i asihata -i tušan, tenteke oibokongge ai gisurere babi, tese ere jalan ci fakcara hamika bime, musei asihata teni jifi jalan -i baru salgabun bi, uthai boo turire adali, tese cimari gūwabsi gurime genembime, muse enenggi teni ere boo de dosimbi, gurime generengge, terei fa beren be hairame karmarakū, terei hūwa nanggin be erime dasarakūngge, sesheri niyalmai enteheme gūnin, inu ai wakašara babi, te bici musei asihata, julesi yabuci deserepi, amasi tuwaci buru bara, dulimbai gurun aika ihan morin aha jušen ojoro ohode, bujubure faitarabure šusihalabure maitušabure jobolon be, musei asihata -i canggi alimbi, dulimbai gurun aika jalan de da ojoro, namhu de culgan jafašara ohode, jorišara fafulara elinture karara wesihun be, musei asihata -i teile bahambi, tenteke ergen dubesileme hutu de gucu arame tenerengge de ai dalji. tese wei guwanta(漠然) seme gamaci, hono gisurere babi, muse wei guwanta seme gamaci, gisurere ba akū kai, ulusu gurun -i asihata be unenggi asihata obure ohode, musei dulimbai gurun uthai jidere gurun ofi, terei ibedere be kemneci ojorakū, ulusu gurun -i asihata be yala sakdasa obure ohode, musei dulimbai gurun uthai duleke gurun ofi, terei bucere be ilihai aliyaci ombi, tuttu ofi te -i tušan, gūwa niyalma de akū, gemu musei asihata de bi, asihata mergen oci gurun mergen, asihata bayan oci gurun bayan, asihata etuhun oci gurun etuhun, asihata dayarakū(独立) oci gurun dayarakū, asihata sulfalinggū(自由) oci gurun sulfalinggū, asihata ibedere oci gurun ibedembi, asihata Eoroba jubki ningge be etere oci gurun Eoroba jubki ningge be etembi, asihata namhu de colgororo oci gurun namhu de colgorombi, fulgiyan šun tuktan dekdeme, terei doro ambula badarambi, bira na ci bulhūme tucime, mederi namu de šuwe dosinambi, butuha muduri tunggu ci dekdeme, esihe wasiha hayaljame midaljambi, šurgan tasha holo de murame, eiten gurgu geleme golombi, giyahūn silmen habtašame deyeme, edun buraki šurgame burakišambi, ferguwecuke ilha teni bongkonome, gilta gilta gehun eldengge ombi, boobai dabcikū be lekeme, dacun jeyen eldepi jerkišebumbi, abka be oci hukšembi, na be oci fehumbi, undu tuwaci minggan jalan bi, hetu tuwaci jakūn lampa bi, juleri on mederi -i gese, jidere inenggi kemuni golmin, yebken kai, musei asihata -i dulimbai gurun, abkai sasa sakdandarakū, horonggo kai, musei dulimbai gurun -i asihata, gurun -i emgi jecen akū.